اوشاويات

أبْسط....هكذا يبدو عالمهم

2011-12-03T16:33:00.003+02:00

هى فعلا ابسط ...او هى بتبسَط ...بتبسط الامور والدنيا والحياة وتحس كده زى ما عمرو كاتب " أقل يعني أنك أكثر خفة ، أنك أكثر حريّة" ...

ابسط يعنى على طبيعتك ...يعنى تعمل حاجة انت عايزها مش علشان المجتمع عايزها ولا لان لازم تتعمل علشان انت مقتنع بيها

يعنى زى ما عمر بيقول اطرح وبلاش تجمع " اطرح كل اللى مش محتاجه ولما تجمع اجمع حاجة فعلا محتاجها لوقتك :)

ابسط هى محاولة من كاتبين "عمر همام وعمرو صبحى " "عمر-عمرو الفرق فى حرف :) " لتبسيط الحياة كا يرونها ومشاركتها مع من حولهم واقتبس من كلام عمر عبر الفضاء العنكبوتى

نصيحة اقرا التدوينات فى هدوء وروقان ...هات مشروبك المفضل واقرا لدقائق واستمتع بالبساطة

http://absat.me/

ابسط تجربة من وجهة نظرى جديدة وخفيفة ...وبتبسط الدنيا المكلكعة اللى احنا عايشينها

للتواصل مع ابسط على تويتر :@absatme

غيَر حياتك بجملة - شباب يصنع التغيير 1

2011-10-05T16:28:00.005+02:00

بعد الثورة بدأت ناس كتير تاخد خطوات فى تغيير بلدنا "مصر " للافضل ....فى ناس بدأت تغيَر فى مفهوم النظافة والحفاظ على الشوارع ....وناس بدأت تنادى بالتعليم وتطويره ...وناس بدأت تاخد خطوات جدية فى تطوير العشوائيات وبناء المجتمع

احمد عادل شاب مصرى و المدير المسئول عن الابتكار والابداع فى احد الشركات فى القاهرة اخد خطوة ايجابية مختلفة نحو تغيير الفكر ....الفكر هو اللى بيشكل جيل جديد ....ثقافة مجتمع ....الفكر هو اللى بيخليك تطور فى نفسك , مجتمعك ....العالم من حواليك .

علشان تغير فى بلدك وترقى بمستوى تعليم وانتاج فى اربع محاور لازم نعتنى بيهم ....

1- الجانب العقلى: " مش بس فى مجالك لازم عينك تشوف وتقرا فى مجالات مختلفة ....ادبية , علمية , دينية ,سياسية ...الخ "

2- الجانب القلبى : انك تتجه قليلا للعلاقات الانسانية سواء باهلك ,جيرانك , زمايلك فى العمل او الدراسة

3- الجانب الروحى : كتير بيفهم الروحانيات انها بس الصلاة والدين ...لكن فى حاجات تانى كتير ...الرحمة , العطف على حد مسكين ماتعرفهوش , او حتى العمل التطوعى ومساعدة ناس محتاجة ....ده اكيد هيغر فى شخصيتك كتير وهتشعر بانك انسان ليه قيمة

4- الجانب الجسدى : العقل السليم فى الجسم السليم ...اسهل مثال على ان صحتك هتأثر على كل السابق ذكره ...لو ما اهتمتش بصحتك عمرك ما هتعرف تهتم بكل اللى فات .....الصحة هى الاساس اللى بنبنى عليه كل شىء فى الحياة .

الاربع محاور دول هما اللى احمد بنى عليهم تصوره فى التغيير اللى فكر انه ياخد خطوة نحوه من خلال 10 صفحات ينشأهم على الفيس بوك ....فيهم كل ما يمكن مساعدتك فى تغيير شخصيتك وبالتالى تغيير مجتمعك .

دورنا فى المجتمع بيلخصهم احمد فى 3 نقاط :

دور قولى : لما تشوف الغلط ما تسكتش عليه من حقك انك تتحدث مع الشخص بادب واحترام وبطريقة يتقبلها وتعرفه انه غلط وطرق تصحيحه

دور فعلى : لا تنتظر ...لو لقيت حد محتاج حاجة ساعده ....ساهم فى تغيير حياة شخص لانك تقدر ....ما تقعدش وتقول وانا هعمل ايه ...ساعد فى التغيير والنهضة لانك جزء من الكيان اللى كلنا عايشينه ولانك جزء مهم فى المجتمع بيساعد فى تغييره للافضل ...خلَى دايما شعارك "انا مصرى ...انا افضل "

دور تقريرى : لو سمعت حاجة غلط او حسيت انها اشاعة اوعى تساعد فى نشرها ....لو تعرف الحقيقة انشرها ولو متعرفش اسكت او ساعد فى تغيير الاحباط لو الخبر ده ممكن يقلل من عزيمة اشخاص فى مجتمعك ...خليك دايما ايجابى

لو كل واحد فينا اهتم فعلا بالادوار دى وكملهم فى شخصيته اكيد هنفرق كتير فى مجتمعنا وهنساعد فى نهضة بلدنا

احمد بدأ فعلا بأول صفحة وهى

IQuote For Changing Your Thought

السبب فى التسمية ...

حرف ال I هو اول حرف فى اغلب منتجات شركة ابل ومن انشاها هو ستيف جوبز وهو مثل اعلى لاحمد لتأثيره فى حياة الكثيرين

اما باقى الاسم لانه شايف انه ممكن جملة تغيَر حياتك ....ممكن جملة تخليك تفكر فى الحياة بنظرة تانية ....تغير فكرك ....وبالتالى تغير فى شخصيتك .

كل يوم فى موضوع معين احمد بيختاره وبيختار الجمل المناسبة ليه علشان تساعد فى نشر فكرة الموضوع " النجاح , العمل , اداب الكلام , التغيير ...الخ " ....الجمل او المقولات بتكون بالعربى والانجليزى ومش مقتصرة بس على ما ينشره ....لو عندك جملة شايف انها هتأثر فى اللى حواليك اكتبها وهو هيساعد فى نشرها من خلال الصفحة علشان تأثر فى ناس كتير

بعض الجمل اللى فعلا اثرت فيا من الصفحة

- الطريق السهل دائماً هو نقد الآخر والطريق الصعب هو نقد الذات
- لا يقاس النجاح بالمكانة التي يتبوأها المرء في حياته، بل يقاس بالصعاب التي تغلب عليها.
- ثلاثة عبارات لتحقيق النجاح: 1- كن أعلم من غيرك. 2- إعمل أكثر من الآخرين. 3- توقع أقل مما يحصل عليه الآخرون
- الخوف من اي محاولة جديدة طريق حتمي للفشل.
- أنا أفضل أن أحاول تحقيق هدف عظيم وأفشل، على أن أحاول ألا أفعل شيئاً وأنجح فيه.

وجمل تانى كتير لو قريتهم كل يوم هتلاقى فعلا طريقة تفكيرك اتغيرت وهتخليك ايجابى فى كل تصرفاتك ....ما يميز الصفحة فعلا انها مش مجرد كلام ....ده كلام ناتج من تجارب ناس نجحت بعد تعب كبير وساعات كمان فشل ....يعنى انت هتبدأمن حيث انتهى الاخرون مش هتبدأمن الاول وتضيع وقت ....يعنى دى مقولات حقيقية مبنية على واقع وتجارب ناس مش كلام من الخيال

انا نفسى جملة غيرت حياتى كلها

The future belongs to those who believe in the beauty of their dreams

لما سمعت الجملة دى قررت انى هصدق حلمى او علشان اساهم فى تحقيقه ....ومن ساعتها عمرى ما ضيعت حلم بحلمه لان لو مصدقتوش عمر ما حد غيرى هيصدقه ....

لو عندكم جمل أثَرت فيكم ....ساعدوا احمد فى نشرها ....ولو شايف الصفحة دى ممكن تغير فى ناس كتير ساعد وانشرها ....ده حلم شاب شاف انه مش لازم يقف يتفرج ....اتحرك واخد خطوة ....من حقه علينا اننا نساعده فى نشر فكرة هتغير فى حياة ناس كتير

علشان تعرفوا اكتر عن الصفحة

Facebook : https://www.facebook.com/iQuote.For.Changing.Your.Thought

للتواصل مع احمد

Facebook : https://www.facebook.com/iAhmedAdel

Twitter :http://twitter.com/#!/iAhmedAdel

شباب يصنع التغيير

2011-09-30T22:15:00.003+02:00

لانى كل يوم بشوف شباب بيزودوا الامل جوايا ان المستقبل احلى ....

ولانى كل يوم بشوف ناس بدأت تغير مستقبلها من غير انتظار ...

لان فى كتير اخذوا خطوة نحو مستقبل افضل ليهم ولينا ...

قررت انى انقل كل اللى بشوفه فى تدوينة اسبوعية واحاول انشره على قد ما اقدر علشان كل اللى مايعرفش يعرف ان الشباب الجديد بيغير كتير اوى فى مستقبلنا ...وان فى مبادرات وشركات بينشأها شباب بس علشان مؤمنين انهم يقدروا يصنعوا فرق

مصر هتكون احلى بالشباب

خلال ايام تدوينة جديدة عن شباب يصنع التغيير

الابداع فى العمل 1

2011-08-29T09:33:00.005+02:00

ليه فى مصر الناس بتضايق لما بتطلب احترام المواعيد فى الشغل ....ليه يطلب منك تيجى فى معادك وهو ما بيحترمش معاده؟

ليه لما يكون عندك اجتماع بيبدأ فى وقته وعمره ما يخلص فى وقته ؟

فاكرة ان مرة فى احد الكورسات اتكلم المحاضر عن الاجتماعات بره وقال كل واحد بيقول هو عايز ايه قبل الاجتماع ما يبدأ الناس بتقعد بس زى وقتها الاجتماع ما بياخدش اكتر من 30 دقيقة !!!...30 دقيقة عندنا فى مصر افتكر هو نص الوقت الضائع "غير الوقت الفعلى " اللى بتضيعه فى المواصلات كل يوم لو مواصلاتك سهلة ومتوافرة طبعا

من الاسئلة المتكررة الملحة اللى دايما بسألها لنفسى ولغيرى ولحد دلوقتى ملقتش اجابة منطقية ليه منطقى انك تستنى عربية الشغل لو اتأخرت ومش منطقى انها تنتظرك لو انت اللى اتأخرت ولو انتظرت هيبقى ذوقيا منهم ....مين اللى اخترع المنطق العجيب ده .....وكان ايه غرضه لما اخترعه !!!! طب هو المنطق ده بيطبق فى مصر بس والا فى باقى الدول كمان ؟؟؟

سؤال كمان هل الانسان ليس ليه ادنى احترام انك تحترم انه واقف منتظرك والعربية اللى هى جماد اللى ليها اكبر احترام ؟!

هل دى ثقافة لازم نتأقلم عليها ونسكت وما نحاولش نصلح فى نفسنا .....هل دى ثقافة من باقى الموروثات اسكت وكل عيش ومعلش وكبر دماغك!!!!

ليه حد يقول ما تدققش فى التفاصيل ليه رجعنا لثقافة ياعم كبر دماغك ..

لحد امتى هنفضل نقول معلش وعدى ومتدققش ....لحد امتى هنفضل نخنق الموظفين ونفتكر انهم هيرضوا ويسكتوا علشان اكل العيش ....لحد امتى تفضلوا تتعاملوا مع الموظفين على انهم عبيد ....ثقافة العمل فى مصر لازم تتغير ...لازم تتغير علشان مصر بتتغير ولو عايزين التعليم يتغير علشان الجيل الجديد يكون احسن يبقى غيروا ظروف الشغل علشان الناس تقدر تبدع

..يا شعب فى ثورة قامت وعدم النظام واحترام الوقت افتكر انه كان من اهم اهداف الثورة .....اتقوا الله فينا وفى الوقت

احترام الوقت والموظف من اهم وسائل الراحة ليه ....ووسائل الراحة دى هى اللى بتخليه يبدع فى عمله ...لو هتشغل حد مبدع ارجوك متخنقوش وتزهقه

عن الشرطة زمان ودلوقتى

2011-06-30T08:03:00.000+02:00

زمان اللى هو قبل الثورة والدى كان قايلى لما عرف انى هعمل مدونة مفيش كلام فى السياسة وزمان علشان كنت بسمع الكلام كنت بقوله حاضر وكنت لما اكتب حاجة اقراها لوحدى او بالكتير واحدة او اتنين من اصحابى وامسحها علشان ميزعلش

زمان كنت لما بشوف اسرائيل بتضرب فى الناس فى فلسطين ...اقول ياربى هما معندهمش قلب ازاى بالقسوة دى ...ازاى فى بنى ادم كده ....وزمان كنت فاهمة علشان هما اسرائيلين فبيربوهم على كده

زمان مكنش فى ثورة كان كل ما حد يحصله حاجة من الشرطة تعذيب قتل او اى اعتداء كان بيتقالنا دى حالات فردية ...كان اخويا بيحاول يقنعنى ان فى فى الشرطة ناس كويسة والمثال ما انا اصحابى كويسين

زمان كنت بصدق ....زمان مكنش فى ثورة بينت خيانة الشرطة وندالتها و ظلمها

زمان فى اول الثورة قولنا على النظام فاسد وشرطة فاسدة .....زمان من كام شهر قلنا تغييرات فى الوزارة وتعديلات ....زمان من كام شهر قلنا الشرطة رجعت فى خدمة الشعب ....زمان من كام شهر قلنا هنحترم ادمية المواطن

دلوقتى لما نشوف اللى حصل فى التحرير واللى بيحصل من ظباط لسة بيحكموا فى البلد مش مطلوب مننا ان لما حد ييجى يقول صدقوا الشرطة تانى انى اصدق ....مش مطلوب اصدق حد بيقولى متعمميش

زمان اتعلمت فى المدرسة قول الرسول عليه افضل صلاة وسلام

"لا يُلدغ مؤمنٌ من جحر مرتين" متفق عليه ....واحنا اتلدغنا كتير اوى

عن وجع القلب

2011-06-26T22:37:00.004+02:00

تشعر انك وحدك ....تجلس فى زاوية بعيدة ....تمسك ورقة وقلم تحاول تذكر اى شىء........تصحو كل يوم لتتذكر كل ما حدث فى حياتك ....ربما تتذكر موقف من الطفولة ...تبتسم ....لا تدوم الابتسامة سوى لحظات .....تحاول مراارا وتكرارا حتى تتذكر ان هناك شىء انكسر بداخلك ....تتذكر لحظة الانكسار ....وتشعر بوجع القلب

هل شعرت يوما بوجع القلب....شعور غريب ....ضيق فى النفس ربما ....فقدان لذاكرة .....او توقف الموسيقى فى حياتك

هل شعرت يوما بالموسيقى تملا حياتك...موسيقى لا يسمعها غيرك ....انت وحدك ....مزيج من البهجة والسعادة ....فرحة .....ابتسامة طفولة بريئة او قفزة طفل سعيد ....دوما تشعر بهذه الموسيقى عند كل انتصار ولكنك لم تتخيل ان تتحول الى موسيقى حزينة فى لحظة انكسار .....فماذا لو توقفت الموسيقى كلها فى لحظة ....كل الموسيقى بفرحها وحزنها .....

تنظر الى الاشخاص كانك لا تراهم ....تحاول ان تفهمهم فلا تعرف .....تبكى ولا تعرف سبب سوى ان شىء انكسر ....عندما يسألك البعض عن هذا الشىء لا يسعك سوى ان تبكى وتقول لا اعرف ....ولكنى اشعر بوجع فى القلب

وجع القلب يا سيدى كانه انكسار ....كان الروح قد انطفأت ....الروح التى تنير حياتك ....وجع القلب لا يداويه طبيب ولا جراح ....جرح غير مرئى ...انت وحدك تشعر به ولا تستطيع ان تصفه لاحد

تظل دوما تبكى وتبكى حتى تغسل قلبك من الدموع ....ومع مرور الوقت تتعلم ان الدموع تغسل العينين ولكنها تقتل القلب

تسمع من بعيد موسيقى خافتة , كلمات بسيطة وصوت فيروز

فى امل ....ايه فى امل ....فتبتسم رغم وجع القلب

ايمان مجدى

26-6-2011

افتقدك

2011-05-01T13:15:00.001+02:00

افتقدك.....

افتقد حركاتك المجنونة للفت الانظار اليكِ

افتقد نظراتك لى فى حزنى

افتقد ابتسامتكِ عند دخولى المنزل

كيف سيأتى شتائى القادم دونك ؟

من سيجلس معى فى سهراتى ....من سيقترب منى فى البرد ليدفئنى

"الله معك يا هوانا ...يا مفارقنا....حكم الهوى يا هوانا واتفارقنا "

تنظر الى صورة قطتها وتستمع الى فيروز فى صمت كل مساء ....لن يشعر احد بما تشعر به فهى لهم مجرد قطة ولها هى الحياة ....

ستظل تحدثها ولن تسمعها ......ستظل تفكر في ابتسامتها ولكنها لن تراها الا فى الصور ....ستظل تبحث عنها فى كل ركن فى المنزل ولكنها لن تجدها ابدا

فلم تترك لها سوى بضع صور واحلى ذكريات العمر

عندى ثقة فيك

2010-12-29T02:12:00.005+02:00

تجلس فى بلكونة منزلها ....فى البرد القارس ...تضع شمعة على المنضدة ...لا يوجد احد على الافق البعيد ....الانوار خافتة فى الشارع ....كل البلكونات مظلمة ماعدا بلكونتها يضيئها ضوء شمعتها برائحة الفانيليا

تستمع الى فيروز فى هدوء

"عندى ثقة فيك ...عندى امل فيك "

تنتظر بفارغ الصبر ان تجد هؤلاء من يمكن الوثوق بهم غير قطتها ,اباها ,امها ,اخيها واصدقائها السبعة المقربون

" عندى حلم فيك ....عندى ولع فيك "

تتذكر حلمها بتحقيق امنية لاحدهم ...وتفكر ترى ماذا ستكون هذه الامنية

تبتسم وتكمل الاغنية فى هدوء مع الاستمتاع بمشروب الشوكولاتة الساخنة

ايمان مجدى

29-12-2010

ابتسامة باهتة

2010-01-26T03:28:00.000+02:00

دوما تراه ....شخص بسيط الملامح ......هو دوما حزين ....يبتسم ابتسامة باهتة ....فقط ليشعر الاخرين انه سعيد ....يخفى الكثير بداخله .....لا يود البوح بالكثير ....بل هو يعشق الصمت ....يتملكه الخوف من كل من حوله .....لا يتعامل مع احد ....يصحو صباحا ليذهب لعمله وياتى مساء ليجلس فى منزله .....منزل كبير لا يوجد فيه الاهو ....الاضواء خافتة .....الموسيقى حزينة ....( حتى فى احضان الحبايب ...شوك شوك يا قلبى )

حاولت مرارا وتكرارا ان تتحدث معه ولكنه لا يجيب على تحيتك ولا تساؤلاتك ....تظن انه يكرهك وانه شخص فظ ....او ربما لا يجيد التحدث مع الغرباء .....تراقبه وترقب تحركاته ....تجده لا يتحدث مع احد حتى اهله لا يحدثهم .....تظن انه اصم ....

تتحرك امامه عله ينتبه لك ....يمر بجانبك ولا ينظر لك ....تظل تراقبه لتكتشف انه لا ينظر لاحد ....يتعامل فقط مع الاشياء اما الاشخاص فلا وجود لهم فى حياته الا قليلا ....حتى اهله لا يتعامل معهم ....تظن انه اعمى لذا يتعامل مع الاشياء بالاحساس ....تشفق عليه وتدعو له ....وتفكر لو انه فقط يشعر يالاشخاص كمثل شعوره بالاشياء لربما تغيرت حياته كليا .

يشغلك التفكير فيه وفى كل ما يفعل وبكل تحركاته ....تجد حياتك قد تحولت فجأة لتصبح حياته ....ماذا يفعل ولماذا ...اين يذهب ومتى ...كثير من التساؤلات تشغل تفكيرك ....تفكر فى طريقة لتخرجه بها من صمته ....تحاول التحدث ثانيا ولكن دون جدوى ....

تذهب اليه تواجهه بما فيه من عيوب وانك تود ان تعرفه اكثر .....لا يجيب ....ترفع صوتك اكثر واكثر .....ينظر حوله خائفا ....تحاول طمأنته ...يبتعد عنك .....يصرخ لا اريد لا اريد اعشق الصمت ......تحاول التحدث بهدوء ....ولكن لا جدوى

لتجد فى النهاية ان ما يفصل بينك وبينه ما هى الا مرآه وما هو الا انعكاس لك

الشوبينج والفيس بوك وسنينهم

2009-10-16T04:34:00.003+02:00

فجاة تحول الفيس بوك لمجموعة محلات متمثلة فى جروبات متنوعة لبيع الملابس والشنط والاحذية..... ليصبح الفيس بوك فجاة ايضا وبقدرة قادر مول كبير ومجمع تجارى لبيع الملابس الستوردة والاكسسوارات وخلافه.
تفتح الفيس بوك لتجد دعوة من صديق او صديقة للمشاركة فى جروب ما خاص ببيع الملابس...الغريب فى الامر ان كل هذه الجروبات تميزهم جملة باقل الاسعار ....والملابس مستوردة .....صينى يا معلم ......ولما لا الصين قد غزت مصر فى كل شىء ....اذن فيجب عليها الا تترك قطاع الملابس ولا تغزوه ايضا ......فالمراة هى اكبر مكسب لاى مستثمر ......
ما تستغربه ان البعض يصدق ان هذه الاسعار قليلة فعلا .
عزيزى المواطن المغلوب على امره اذا كنت لا تمتلك جهاز كمبيوتر او حتى حساب فيس بوك اذن فاسهل طريقة ان تنزل الى محلات وسط البلد والمولات القريبة لتجد نفس الملابس بنفس الاسعار المخفضة ......لان الصين نقلت نشاطها مصر

ايمان مجدى

شبح الندم

2009-09-14T01:16:00.005+02:00

تركها وحيدة .... هى فى الخامسة عشر من عمرها ....مازالت صغيرة ....ستحب غيره وتجد من يحبها اكثر منه .....كل هذا كان مجرد حب مراهقة .....هذا لم يكن حبا حقيقيا والا كان قد كتب له النجاح

اصبحت تستمع الى اغنيتها المفضلة .....( لو مرجعتش ليا بقلبك تانى هنا ....لو محلفتش ان الثانية فى بعدى سنة ........مبقاش انا )

************************************

بعض الاحيان لا نرى ما تخفيه الايام ونبرر كل ما يحدث حولنا ......ولكننا مع الوقت نفهم ونعى ما يحدث ************************************

تركها وحيدة ....اظلمت حياتها .....اصبحت فى العشرين ....فتاة لا ينافسها فى جمالها من هم فى سنها ......لماذا تركها ..... هل احبها بحق .....لن تفكر كثيرا.....ستطوى هذه الصفحة من حياتها .....ستبدا من جديد .....ستحب غيره وتجد من يحبها اكثر منه .....هذا لم يكن حبا حقيقيا والا كان قد كتب له النجاح

اصبحت تستمع الى اغنيتها المفضلة ( لو مرجعتش ليا بقلبك تانى هنا ....لو محلفتش ان الثانية فى بعدى سنة ........مبقاش انا )

*************************************

ربما لو وضعنا اخطاءنا امامنا ما كررناها مرار وتكرارا ......المواجهة دوما هى الحل الامثل *************************************

تركها وحيدة ...تفكر ماذا ستفعل ...اصبحت فى الثلاثين من عمرها.....يمر العمر دون ان تجد ضالتها ...... لن تفكر كثيرا.....ستطوى هذه الصفحة من حياتها وتكمل طريقها الى النهاية .... هذا لم يكن حبا حقيقيا والا كان قد كتب له النجاح

اصبحت تستمع الى اغنيتها المفضلة.... (انا دلوقتى براجع نفسى قبل ما الايام تفوت ....وعشان حاجات تعيش ....حاجات كتير لازم تموت ............)

************************************

احيانا يكون عدم التفكير لفترة...... هو الحل الافضل للوصول لحل

************************************

فى الاربعين من عمرها وجدته .....هو ضالتها ....من ظلت دوما تبحث عنه فى كل من قابلتهم .....احبها اكثر مما احبته .....احترمها ......اعطاها ما ارادت الحب ....الامان .....الاحترام ....اخيرا ابتسمت الحياة

لن تتركه يبدا بالبعد ....ستكون هى من تتركه ....ستنتقم منهم كلهم فيه هو .....ستتركه ليتألم مثلما تألمت فى كل مرة .....ولم تكن تعى انها هى من ستتألم .....

************************************

تردد جملة واحدة .....ياريتنى عرفتك من زمان

************************************

شكر خاص ل "أحمد حماد" لاختياره الاسم .....نردهالك فى نوت يا فندم

************************************

رمضانيات .....(1)

2009-08-25T13:00:00.003+02:00

فجأة تحولت حياتنا الى مجموعة مسابقات ....كل القنوات تعلن عن مسابقات مختلفة ...لتجد نفسك دوما امام اختيارات ...و لابد ان تختار الجواب الصحيح ....الغريب ان هذا الجواب لا يساعدك على التقدم فى حياتك ولا على مساعدة وطنك على التقدم وانما للفوز ببضعة الاف من الجنيهات ان لم يكن الف او الفان اسبوعيا ....يكسبها فقط سعيد الحظ ....اذن فالموضوع ليس مرتبط بالفهم او الاجتهاد كما تعلمنا وانما هى ضربة حظ .....وما يستعجبنى حقا اننا تعودنا ان نستعجب من وجود هذا الكم الهائل من المسلسلات فى رمضان واستنكاره ايضا ....رغم ان معظمنا يتابعها باستمرار ولكن ما لم نستنكره هذا الكم الهائل من المسابقات ....تفتح التلفزيون لتجد مسابقة ثم اخرى ثم اخرى ثم مسلسل ثم فاصل اعلانى عبارة عن مجموعة مسابقات .....وان كان اكثرها قد تحول الى برامج فى رمضان يتابعها معظم الاشخاص بلهفة ....لمعرفة الحل الصحيح ....

اذن يا عزيزى لا تستعجب عندما تجد حياتك بعد ذلك قد اصبحت مسابقة كبيرة... لتجد الاب عندما ياتى من عمله يسأل زوجته ( طبخالنا ايه يا ولية )

لترد بسرعة ( تفتكر طبخالكم ايه:-

1- ملوخية بالارانب

2- بامية باللحمة الضانى

3- هناكل الموجود

ليرد الولد بسرعة ...انا عرفت الحل

وترد الام : شاطر يا سحس ......

وتنظر للاب وتقول : لو عايز تعرف الحل اخطف رجلك لحد المطبخ ......او بص فى جيبك علشان تعرف ان احنا مش معانا حق اللحمة او الارانب .....

**************************************************************************************

ولو عرفت الحل احمد ربنا انك اصلا لاقى تاكل ....يا راجل ده فى غيرك فى الصومال ما بياكلوش ( وليه الصومال فى ناس كتير فى مصر مش لاقية الاكل )

********************************************************

وابقوا قابلونى فى الحلقة الجاية

قطيعة محدش بياكلها بالساهل *******************************************************************************

هتصوم .......والا زى كل سنة ؟؟؟؟

2009-08-15T23:45:00.010+03:00

هتصوم والا زى كل سنة ..........فكر كويس بلاش تتسرع قبل ما تجاوب ........كل كلمة محسوبة عليك فكر على اقل من مهلك ........... من الاخر خد وقتك خااااااااااالص
الجملة دى لازم تسمعها اول رمضان او قبليه بكام يوم..... ولو فى رمضان تبقى صايم والا زى كل سنة ......وبعد رمضان صمت والا زى كل سنة .
الجملة دى اساسية معرفش ليه , يعنى هتروح بيت العيلة تلاقى خالتك او عمك يقولك ها يا حبيبى صايم والا زى كل سنة ............. او جاركم وانت طالع يقولهالك وهو فرحان قوى انه بيخدعك خدعة فولاذية.... فزورة عمر ما حد هيحلها..... او حد من اصحابك عامل نفسه اذكى الاذكياء وبيقولها وهو حاطط ايده فى جيبه وكان محدش زييه
المهم مش الجملة............... المهم ردك ايه فكر كويس قبل ما ترد
يعنى مثلا لو قلت هصوم وفاكر نفسك اذكى اخواتك وتلاقى واحد يقولك يعنى كل سنة ما بتصومش
او تبقى اذكى من اللى فات وعامل فيها السبع رجالة وتقول زى كل سنة وييجى الرد السريع يعنى كل سنة ما بتصومش
وعلشان كده انا بمشى بنصيحة حد مش فاكرة مين بصراحة قالى الصح تقولى هصوم زى كل سنة
وعلشان كده كل اللى كان ناوى يسالنى واللى سالونى انا بقولكم

انا صايــــــــــــــــــــــمة زى كل سنة

وكل سنة وانتوا طيبين

امبابة.......... رايح جااااى

2009-07-23T00:22:00.002+03:00

اكل العيش مر .....ومن مرراته ممكن يخلى ناس كتير تعمل حاجات غلط ....والحقيقة ده مش مبرر .....الفقر والجوع ملوش مبرر ....بس اسهل رد هتسمعه انك مش فقير علشان تحس بيهم ....وان اهلك معيشينك فى نعيم ....ده كفاية يا راجل انك بتفطر وتتغدا وتتعشى .....لو قلنا ان الفقر بيبرر الغلط فى منطق الفقرا ....فلا يمكن هنقول انه بيبرر الحسد والحقد على الناس ....ولا هيبرر ان الناس تتجنن ....وتلاقى المبادىء عندهم اتشقلبت
*********************************************************
المقدمة دى كانت مقدمة لموقف حصللى انا وصديقتى العزيزة اسراء حامد واحنا راجعين من امبابة من عند النجار علشان القطعة اللى كنا بننفذها لمشروع التخرج ودى كانت تانى مرة فى حياتنا نروح امبابة ........ركبنا تاكسى للجيزة لاننا منعرفش اى مواصلات ممكن تودينا الجيزة .....وفى التاكسى اتفرجنا على فيلم عربى عجيب ينافس كل الافلام الهندية اللى ممكن تكون سمعت عنها او شفتها وكان الموقف كالاتى :
اسراء شاورت للتاكسى .....وقف التاكسى مركب واحدة ست ومعاها طفلين فى الكرسى اللى جمب السواق .....فى موقف زى ده هتتتخيل ان اللى جمب السواق يا مراته يا اخته يا واحدة قريبته وانا من اول الكلام واعذرونى فى انى سمعتهم توقعت انها اخته
المشهد الاول :
************
الست ( اخته او مراته او قريبته ) : ها مش ناوى تتجوز
السواق : هتزعلى
الست ( اخته او مراته او قريبته ) : لا مش هزعل بس انت اتجوز
السواق : خلاص اتجوز
الست ( اخته او مراته او قريبته ) : طب لقيت العروسة
السواق : اه موجودة
الست ( اخته او مراته او قريبته ) : اسمها ايه
السواق : ياسمين
الست ( اخته او مراته او قريبته ) : الله اسم جميل اوى ....تخيل كده وانت متجوز ياسمين ( هى قالت جملة تانية بس انا مش هقولها لانها غلسة )
السواق : اه اكيد
الست ( اخته او مراته او قريبته ) : ودى مين نعرفها ( الجملة دى اكدتلى انها اخته )
السواق : لا متعرفيهاش
الست ( اخته) : لا بجد مين ياسمين
السواق : دى زبونة كده كنت اعرفها بس قمر
الست ( اخته) :طب حلو اوى
**********************************************
من خلال الكلام اتاكدت انها اخته والعيال دول ولادها ......وانا طبعا فكرت فى قصة ...الست دى اخته وهو بيوصلها لان جوزها مسافر فى شغل او ان جوزها متوفى علشان هى لابسة اسود وبدات فى التفكير فى قصة من نسج خيالى كالمعتاد لحظات وبدا الكلام يتغير ........وبعدين ده انا كنت قفلت القصة وهنزل كلمة النهاية ما علينا نشوف المشهد الجديد:
المشهد التانى :
*****************
الاولاد بيتنططوا وواحد فيهم بيعلى الكاسيت والسواق يوطيه وهكذا والناس اللى قاعدة فى الكنبة اللى ورا ( انا واسراء ) ودانهم هتتخرم بس مستحملين علشان الولد زى العسل بيعليه ويبصلنا ويضحك الولد الكبير زهقان من مامته
السواق : معلش احنا نوديك اسبوع عند ستك اهو ترتاح منها شوية
الولد الكبير : يارييييييييييييت ....وبيقولها بغل ( ملحوظة كبير ده سنه لا يتعدى 6 سنوات تقريبا )
السواق : خلاص نوديك النهاردة ونطلع انا وامك واخوك راس البر اسبوع
مممممممممم ايه اللخبطة دى .....عموما جايز هيفسح اخته ما هو مش متجوز معندوش مسئوليات ***************************
المشهد الثالث :
*************
السواق: فاكرة لما كنتى عاملة شعرك قبل كده واحنا خارجين ( ملحوظة هى محجبة .....جايز قبل ما تتحجب )
الست ( اخته ): واحنا مخطوبين والا بعد ما اتجوزنا
اقف عندك هنا .....مخطوبين .......اتجوزنا ......ايه اللخبطة دى .......تبقى مراته .......تبقى الست ( مراته ) ولا هى متجوزة وجوزها سافر ولا ميت علشان كده لابسة اسود ونبدا نكمل القصة من منطلق انها مراته
السواق ( الاب يعنى ): لا بعد ما اتجوزنا
الست ( مراته طبعا ) : انااااااااااااااا .. انا عمري ما عملت شعري بعد ما اتجوزنا .. لألأ ااااااااه ساعة فرح سعييييد
السواق: اه الست : اه فاكره .. اه صحيح ؟؟ تحب اعمل شعري كده فى فرح .....(حد قريبهم بس غالبا بيكرهوه) ولا اتحجب ......( ملحوظة هى اصلا محجبة )
السواق: لااااااااا انا عايزك يومها تبقى بطلللللللللللة........( ده بياكد جملة ان الرجالة ماتوا فى الحرب )
الست : طب الكاوافير (هى بتقولها كده ) مقدور عليه المهم اللبس
السواق: انتى تاخديلك 200 جنيه تجيبى بيهم طقم ابن ........... ومش مهم انا والعيال احنا هنقضى باللبس اللى عندنا

ممممممممم ..........ما علينا كان فى باقى مشاكل اسرية لا داعى لذكرها بالتفصيل عن عدد البنطلونات اللى عند السواق والقمصان وهيجيب بدلة منين وقصص وحوارات كتير وكان اللى فى الكنبة اللى ورا هوا
*************************************
طبعا فى طول الطريق السواق بيشتم فى خلق الله والتاكسيات ومراته بتقوله ...عيب كده معانا ناس ......زهى غالبا بتاخد بالها وهو بيشتم بس
***************************************
المشهد الاخير
************
عدت عربية جمبنا شكلها من العربيات الهيونداى ( انا مبفهمش فى العربيات وكل العربيات عندى هيونداى يعنى شكلها حلو )
دلوقتى هيبدا المشهد
السواق: ايه ده دى عربية الحاج .....
.مراته : يا سلام....مين ده
السواق: الحاج .........ودى مراته وبنته
مراته : قصدك الحاج .........بتاع ..........

فى الوقت ده وهما بيتكلموا كان عمال يزنق على عربية الحاج لحد ما السواق عمله باى وهو عمل باى بتناكة كانه مكنش واخد باله بس كان فرحان قوى معرفش ليه
السواق: اه ده بانى دلوقتى حتة عمارة ما هى دى ناس معاها فلووووووس مش زينا ساكنين فى امبابة وعلى قد حالنا
مراته : ودى مراته وبنته........ دول اخوات
السواق : لا يا ستى دى امها بس اصلها بتروح للكاوافير كووول يوم عند الكاوافير ....تصحى تنزل للكاوافير وطول اليوم عند الكاوافييييير ما هى ناس معاها فلوس

انا واسراء خفنا على نفسنا وكنا خلاص قربنا قلناله لوسمحت على جمب وكنا مترقبين للعربية بتاع الست مراة الحاج وبنته انها تنفجر من كتر الحسد والحقد العلنى بتاع الراجل ومراته وانتهى الفيلم العربى بالنسبة ليا لحد ما نزلت بس قعدت افكر فى قصة جديدة فى مصير زوجة الحاج ....ممكن مثلا العربية تنفجر والا وهى فى الكاوافير يبوظولها شعرها او ممكن الكاوافير يقفل اصلا او العمارة اللى فيها الكاوافير تنفجر وقصص تانية كتير بس الاحلى كان الفيلم اللى اتفرجنا عليه افتكر بعد كده مش محتاجين نروح سينما
الموقف ده ياكد ان الافلام العربى اثرت فينا كلنا وليها بصمة فى كل بيت فى مصر
النـــــــــــــــــــــــــــــــــهاية
*********************
نقلتها اليكم : ايمان مجدى
مراجعة : اسراء حامد

نظرية الكوكو

2009-06-19T13:49:00.001+03:00

ليه كده بس يا كوكو ....حصل ايه يا كوكو .....معلش يا كوكو .......مين كوكو طيب
كوكو هو انا وانت وهى لو وقعنا حظنا فى حد من المقتنعين باننا كلنا كوكو .....لو حد من اصحابك او معارفك دايما بيقولك يا كوكو وانت مفيش فى اسمك اى دلالة لاى حاجة تخلى دلعك كوكو هتحس باللى انا حساه ولو انت لسة متدلعتش يبقى ندعيلك الهى يكرمك باللى يدلعك ويهنيك .....بس ميقولكش يا كوكو

فى الفترة الاخيرة لاحظت ان ناس كتير اصبحت كلمة كوكو عندهم هى دلع لاى حد يعرفوه .....كوكو اصبحت موضة بعد موضة يا قمر ويا عسل ويا جميل ويا روحى ويا حياتى ......اللى اغلب الناس بتقولهم وهما مش حسينهم اصلا بس مش مشكلة دى موضة ولو متبعتش الموضة تبقى اولد فاشون بالعربى كده دقة قديمة

زمان كانت جدتى لما تقولنا تعالوا كلوا الفرخة كانت بتقول كلوا الكوكو .....وده اللى خلانى اتضايق لما حد يقولى يا كوكو ....لما ربطت الكلام ببعضه لقيت انى بقيت فى نظر الناس كلها فرخة مثلا .....وساعتها اتعصبت واتضايقت ازاى يعاملونى على انى فرخة فى انفلونزا الطيور يا اخوانا عايزنهم يموتونى زى ما بيموتوا الفراخ والا عايزنى اتعب واموت ........بس مش مشكلة كوكو يعنى فرخة .....المهم ان كوكو مش يعنى خنازير

بيــــــان هــــــــــــــام

2009-06-04T12:20:00.006+03:00

اكره الاسئلة النمطية .....الاسئلة التى كثيرا ما تتكرر .....وفى كل مرة يسالك الشخص نفس السؤال..... يساله كانه لا يعرف الاجابة مسبقا ....لذا فضلت ان اجيب عن كل الاسئلة حتى اضع حد لهذه التفاهات واستريح منها ولو للحظات

ما بترديش على الموبايل ليه –موبايلك مقفول ليه :

*********************************
فى الحقيقة انا اكره الموبايل ....بل وامقته ولكن ماذا افعل ما باليد حيلة ابى يريد ذلك هو من يطلب منى ان احمله وامى ايضا ....ابى يكره الموبايل ايضا ولا يجيب عن كثير من المكالمات ولكنه يصر ان اجيب انا عن كل المكالمات ....اذا يا سيدى الفاضل لو كنت ستقرا هذا الكلام فاعلم انى مثلك ورثت عنك اغلب صفاتك وهذه الصفة ايضا ورثتها منك ....فالذنب ذنبك وليس ذنبى ....والى كل من يريد ان اجيب على الموبايل ......فاجعلوا ابى يفعل ذلك ايضا

ساكته ليه ....ايه اللى مضايقك :
******************

افكر .....يا عالم افكر .....اليس من حقى ان اسرح للحظات ان اتخيل نفسى ورقة , نملة , زرافة .....او حتى بتنجانة ........اتركونى افكر فى صمت ......ارحمونى يرحمكم الله

ايدك بتترعش ليه :
***********

طبيعى .....احلف بل واقسم انى ولدت هكذا هذه الرعشة ليست خوف او توتر .....خلقت هكذا .....حد عنده اعتراض

صوتك مش سامعينه ....على صوتك شوية :

***************************
ماذا افعل لكى تسمعونه ...انا اسمعه مرتفع بطريقة مزعجة فاقوم بخفضه اكثر فلا تسمعونه انتم ....وحتى تسمعونه انتم ساصاب انا بالصداع وارتفاع الضغط ....فهل هذا ما تريدون ........انا لن ارهق نفسى من اجلكم ....تريدون تدمير صحتى حتى تسمعوا صوتى ........هبقى اكتبلكم الكلام فى ورقة .......او ساتعلم لغة الاشارة

صوتك لا يتناسب مع طولك :
******************

بالله عليكم هل هذا كلام منطقى ....وما علاقة الطول بالصوت ....هل هذه مسألة فيزياء او رياضة .....اتركولى صوتى .....او فليشترى لى احدكم ميكرفون اتحدث فيه ......وله منى التحية

انتــــــــــــــــــــــــــــتهى البيـــــــــــــــــــــــــــــان

بالعند فيكم ...عندى صداع

2009-05-07T19:50:00.002+03:00

ساعات بنحس بحاجات وما بنعرفش نعبر عنها ......وساعات بنحس بحاجات ما نقدرش غير اننا نكتمها جوانا ونسكت..... نسكت حتى اننا نتكلم فيها مع نفسنا ....... بيبقى السكوت هو الحل ......حل للمشاكل واحيانا لا...... بس ما بيكونش فى ايدينا غير اننا نسكت .
وانا يا جماعة من المكان اللى انا قاعدة فيه دلوقتى بعلنها انى مخنوقة ( ايوة الله مخنوقة ) ارجوكم بلاش تعيطوا من زعلكم عليا .....

انا مخنوقة من حاجات كتير بس للاسف معرفش ايه هى ( بلاش كلمة ايه العبط ده سمعاك ياللى بتقولها )

طب يعنى عمر ما حد فيكم حس انه مخنوق قوى ومش عارف مخنوق من ايه… من اللى بيحصل حواليه جايز.... ان مفيش تقدم فى حياته برده جايز لكن بتلاقى دايما الشعور بالخنقة بيتزايد ويتشعب ويتوغل وينتشررررررر ...احم المهم كنت بقولكم مخنوقة ومش عارفة من ايه بس لاحظت دايما ان كل ما اصحابى يشوفونى يقولولى مالك يا بنتى ايه اللى مضايقك مع انى بكون ساعات فرحانة بس غيظا فيهم وعقابا لسؤالهم بقولهم هو بايين عليا يقولولى جدا ....ابص للارض فى اسى (حزن يعنى ) واقولهم اصل عندى صداع وانا ممكن ابقى كويسة بس اهو غلاسة بقى
وارجع البيت واحاول ابص لنفسى فى المراية واغنى قول ياللى فى المرايا فهمنى يا اخويا الهى يهديك ايه الحكاية ..... ايه اللى فيا حسسهم انى مخنوقة متضايقة قرفانة برضو معرفش .
لاحظت بقى فى مرة ان فى واحدة صاحبتى سالتها هو انتى ليه شايفانى متضايقة ردت رد استفذنى شوية اصلك هادية حبتين ( قال يعنى لو اتكلمت ابقى مبسوطة ) طب ما انا بتكلم اهو وبرضو مخنوقة ولاحظت الاتى :

ان المطلوب منى انى اصحى الصبح وبقى( فمى يعنى) جايب لودانى من كتر الابتسامة العريضة وانا بقول لماما صياح الخير .....وانزل فى الشارع مبسوطة وانا بقول للتاكسى جامعة لوسمحت...... وادخل الكلية مبسوطة وانا بقول لاصحابى اذيكم

وابقى فى قمة الانبساط وانا فى السكاشن العظيمة والمحاضرات .

يا جماعة الانبساط حلو اه انا مش مختلفة وابتساماتك فى وجه اخيك صدقة اكيد بس برضو مش لازم ابقى ليل نهار مبتسمة طب وماله لما ابقى هادية ده حاجة كويسة برضو .....والا فى حد معترض
جايز الهدوء بقى حاجة وحشة ولازم علطول ابقى فرحانة وعمرى ما اسرح وافكر فى حاجة وانا قاعدة لوحدى مثلا ولازم ادخل اصبح على اصحابى بنكتتين جامدين.
وبالمناسبة دى بقى احب اهدى اهداء خاص لاصحابى اللى معايا فى قسمى العزيز النكتة اللى كنت بقولهالهم كل يوم واللى بقالهم وقت كتير اوى ما سمعوهاش وده بسبب بكالريوس اللى بوظتلى حياتى كلها
مرة واحد بيقول لواحد انت معانا والا مع الناس التانيين قالوا معاكم قالوا احنا الناس التانيين
وبقولكم صحيح الدراسة قربت تخلص يا حلوين بس لسة فى امتحانات وهفضل على قلبكم انا ونكتتى وهدوءى ويا انا يانتوا فى الزمن ده .

من انت .......؟

2009-04-26T01:05:00.003+03:00

عندما تحتاجه ......... ولا تجده

عندما تنتظره ..........ولا يأتى

عندما تتكلم .........ولا يسمعك

عندما تسأل ........ولا تجد اجابة

عندما تتواجد ........ولا يشعر بك

عندما تفشل ........ويعلن البعض انتصارهم

وعندما تنجح .........ويفخروا انهم لطالما ساندوك

وهم لا يعرفون .......من انت

عمرك فكرت تقتل ؟؟؟؟؟؟

2009-04-07T06:47:00.004+02:00

عمرك فكرت تقتل .......... اه تقتل .......لالالا مش بتكلم عن الحشرات والحيوانات ........لان دول صعب قتلهم
اكيد هيصعبوا عليك ......اه يصعبوا عليك ....الصرصار اللى طالع يجيب اكل لعياله المساكين ...والا النملة اللى بتجرى على عيلة كاملة وابوهم العاجز .......والفار اللى لسة متجوز حتى مشفش اول واحد من عياله .

المقصود من كل اللى فات ان الكائنات دول غلابة قوى دول حتى شقيانين وتعبانين يعنى الناموسة اللى بتمص دمك بتعمل كده ليه ......غلاسة لا .......فاضية مثلا , برضو لا .....كل الحكاية انها عايزة تعيش وعلشان تعيش لازم تمص فى دمك وتموتك بالبطىء وتخلى عيشتك لا تطاق بس ع الاقل يا سيدى دى بتمص دمك وانت نايم مش طوووول اليوم يعنى .......والا ايه .
انا بتكلم عن قتل البنى ادمين .......اه بنى ادم زيى وزيك ........لا مش صعبة دى سهلة جدا ....اسهل حتى من عمل كباية شاى ........كل يوم فى اكتر من 100 بنى ادم بيموتوا ......موتة طبيعية ........او فى قطر (زى قطر الصعيد اللى بيتقلب كل كام سنة مثلا ) او فى عبارة او حتى فى حرب ........شفت مفيش اسهل من كده ازاى .
افتكرت بقى والا لسة .........عمرك فكرت تقتل بنى ادم ؟؟؟؟؟؟؟؟
جايز فكرت ومش عارف .... او يمكن مش فاكر ....... انا جاية افكرك زى ما الاغنية بتقول ( ان كنت ناسى افكرك ) يا حلو ....
اكيد مرة فكرت تقتل الولد او البنت اللى كانوا بيطلعوا الاوائل .......اللى بسببهم كنت بتبقى بليد ومبتعرفش تذاكر ....او زميلك اللى كان بيقف ع الفصل ودايما يكتب اسمك مع انك ما بتتكلمش بس هو كده ......غلس وبيكرهك .

او ممكن المدرسة اللى كانت دايما تاخد الحصص الاحتياطى او حصص الالعاب وتشرح فيها ........وتضيع احلامك انك تلعب او تعمل واجب الدرس.

او باباك ساعة لما رفض يوديك الرحلة اللى تبع المدرسة وانت فى ابتدائى ......والا مامتك لما رفضت تنزلك تلعب مع اصحابك علشان انت زعلتها ( انت لسة فاكر ........انسى يا بنى.....بلاش السواد ده )
قريبك اللى كان دايما يسالك عايز تطلع ايه لما تكبر .......طب وهو ماله .......والا جارتكم اللى كانت بتزعق لما تلعبوا علشان دايما صوتكم كان عاملها ازعاج .......ودايما تقنع مامتك انها تخليك تبطل لعب ........لا وكمان تتعاقب .
ولما كبرت وكبرت اهتماماتك كبرت معاك فكرت القتل .......الدكتور اللى بياخد الغياب فى اول المحاضرة ........ومحدش يدخل بعده ابدااااااا.......او الدكتورة اللى بتخليك دايما تعيد اللوح اللى كنت سهران فيها طول الليل .........علشان مش عجباها ........... مديرك فى الشغل اللى دايما قارفك ومطلع عينيك .........والاجازات ممنوعة ........خالص ..........

او يمكن سواق التاكسى اللى اخد منك 5 جنيه فى توصيلة ما تستاهلش حتى 2,5 .....هتعمل ايه بقى ف الطمع .......

او اخوك او اختك او حد من قرايبك او زمايلك او اى حد قابلته فى حياتك او حتى ..........حد من اصحابك قالك عليه
لو كنت فكرت يبقى انت فى السليم ........اما لو ما فكرتش.....يبقى لازم تبدا تفكر ...مين اللى لازم ينول الشرف ده ..... شرف انك تقتله
يا قااااااااااااااااتل

اصدق ام لا اصدق !!!!

2009-03-28T21:43:00.004+02:00

فى الفترة الاخيرة بدأت أفكر فيما يحدث حولى بمعنى ان الاحظ كل ما يحدث وكل كلمة تقال وبالاخص بدات اترقب واتعلم وابحث هل ما علمنى اياه والدى صحيح ام لا وكانت هذه الملاحظات :-

اولا : الكذب حرام ....اتفق جدا فى هذه المقولة وذلك لان الله سبحانه وتعالى نهى عن الكذب ولانها اخلاقيات ومن اخلاقنا كمسلمين وكمصريين الا نكذب .....لذا فقد امتنعت عن الكذب ولكن كل من حولى يكذبون فكيف لى لو انى طفل صغير ان اصدق كلام والدى ؟؟؟؟؟؟

ثانيا : الظلم حرام ....اتفق جدا فى هذه المقولة ايضا لانه كلام الله والله سبحانه وتعالى هو العدل وامرنا بالعدل
واختلافى هنا ايضا لو انى طفل صغير فى مدرسة اظلم لانى لست ابن مدرس او دكتور او ايا كان و ارى ابن المدرس والدكتور والاشخاص الذين سيحققون المصالح لمدرسى هم من يعاملوا افضل منى وانا اظلم
هل لى ان اصدق كلام والدى ؟؟؟؟؟؟؟؟

ثالثا : السرقة حرام .....اتفق ايضا فى هذه المقولة ولقد نهى الله سبحانه وتعالى عنها وفى مجتمعنا من المفترض اننا نبتعد عن السارق وفى مجتمعات اخرى يطبقون الشريعة ويقيمون عليه الحد
لكن اسمحوا لى ايضا لو انى طالب فى مدرسة وسرق زميلى ولم يعاقب لانه ابن مدرس وسرقت انا وعوقبت لانى ليس لى اب مدرس ..
هل لى ان اصدق كلام والدى ؟؟؟؟؟؟

رابعا : الفتاة لا يجب ان تعرف شابا قبل الزواج ....ويقول اخرون ان الحب حرام
اتفق وبشدة فى جزئية انه لا يجب ان تخرج فتاة مع شاب قبل الزواج وهذه اخلاقيات تربينا عليها هذه تقاليدنا كمصريين وكعرب ولا اتكلم عن العادات والتقاليد الدخيلة بان يكون للفتاة بوى فريند
ولكن لو انى فتاة فى سن المراهقة اليس من الممكن ان اتاثر بمن حولى وارى كل من حولى يعرفون شبابا ولهم بوى فريند ثم يتزوجون بسهولة ولا يهتم احد بعلاقاتهم السابقة
هل لى ان اصدق والدى ؟

كثيرا مما علمنا والدانا لا يتفق مع ما نعيشه الان فى حياتنا هذه اخلاقيات علمنى اياها والدى واحترمها بل واننى احافظ عليها مهما حدث من حولى ,ولكن هنا كنت اتسال بلسان من هم ليسوا مثلى ممن ينظرون حولهم ويحاولون مجاراة الحياة واشكالها, فلو انى طفل صغير فى هذه الحياة ربما كنت سأكره والدى الذان علمانى عادات لا تطبق ومفاهيم لا نراها ......

واخيرا ربما نعلم اولادنا ما نحبه لهم وما فيه الخير لهم وما نراه صحيحا وما امرنا به الله سبحانه وتعالى , ولكن لكى يصبحوا قادرين على مجاراة الحياة لابد لنا ان نغير من انفسنا حتى يروا ما حولهم مثل ما تعلموا

ايمان مجدى

عندما تعامل باحترام ......زيادة عن اللزوم !!!

2009-03-22T19:42:00.007+02:00

شاءت الاقدار ان يتعلق جزء من مشروع تخرجى بدولة جنوب افريقيا , جزء من المشروع يتعلق بعمل التصميمات الداخلية لمطعم افريقى ولحسن حظى ايضا توجد مادة اخرى متعلقة بنفس الموضوع والبحث عن ما يتعلق بهذه الدولة .
اشتركت مع مجموعة متكونة من 10 طلاب جميعنا نبحث عن هذه المعلومات ولحسن حظى ايضا و اؤكد انه من حسن حظى اننى كلفت بالذهاب الى السفارة وكان من المفترض ان اذهب الى المركز الثقافى .....ولكن اى مركز ثقافى ....انا لا اجد اى معلومات ففكرت ان اذهب الى السفارة ربما اجد منهم اى معلومات عن المركز الثقافى .
اؤكد ذلك لاننى لم اكن افكر ان اسال احد من السفارة عن اى معلومات عن البحث .

وصلت الى مبنى السفارة فى احدى عمارات حى المعادى الراقى .
سالنى موظف الامن عن حاجتى للسفارة فاخبرته انى طالبة واود معلومات عن المركز الثقافى حيث انى لا اجد له عنوان فطلب البطاقة ثم تحدث بكل ادب... انسة ايمان اتفضلى البطاقة , حضرتك اخر اسانسير فى الطرقة الدور السادس ....اكد اكثر من مرة بادب حتى لا اضل طريقى ....تركته وذهبت الى الاسانسير .
كنت فى اقصى مراحل السعادة من هذا الشخص ومعاملته لى باحترام وهوغير ملزم بذلك .
عندما وصلت الى السفارة سالنى الرجل بالخارج عن حاجتى فاخبرته انى اريد معلومات عن المركز الثقافى ...فطلب منى البطاقة والانتظار للحظات ....امسك سماعة التليفون وتحدث عبر الهاتف مع شخص ثم وجه كلامه لى ....تبع شركة ايه فقلت لا انا طالبة ...فى فنون تطبيقية نفس الاحترام قال وما المعلومات المطلوبة , قلت اريد ان اعرف كل المعلومات الممكنة عن جنوب افريقيا , الخامات المستخدمة والاثاث والتصميم الداخلى والحياة والمناخ ...كل شىء اخذ البطاقة واعطانى كارنيه ...ثم طلب منى ان انتظر فى الاستقبال وسيعطينى احد الاشخاص بداخل السفارة كتب .
عندما دخلت خطرت لى عدة افكار . اولها هذا الشخص سيعاملنى بادب ولن يعطينى شىء .
او انه يمكن ان يعطينى كتاب او اتنين ثم يتركنى مدة لاتصفحهم .
ثانيهم انه اذا تحدث بادب فلن يعاملنى بادب زائد عن الحد
عندما جاء قال انسة ايمان واعطانى شنطة مليئة بالكتب تحديدا عدة كتيبات ومجلة كبيرة فى هدوء اعطانى الشنطة ....(هذه الشنطة لى انا , هذه الكتب اصبحت لى )
سالته الا يوجد مركز ثقافى ورد للاسف لا
وخرجت وانا مندهشة وسعيدة من كل هذا الادب فى المعاملة الذى نفتقده كثيرا قى معاملتنا اليومية.
لا اتحدث باستغراب عن الادب حيث انه من الصفات التى لابد وان تتوافر فى كل انسان ولكنى اتحدث عن الف باء انسان ان يحترم اخوه الانسان وهو شىء قلما نجده فى تعاملتنا اليومية .
سفارة جنوب افريقيا ....لكى كل الحب والتقدير وشكرى للقائمين على اعمال السفارة واتشرف ان هذه الدولة ستكون جزء من مشروع تخرجى .
نعم لقد عوملت بادب ..........فى بلدى

اسئلة تحيرنى

ـــــــــــــــــــــــــ
بالصدفة ذهبت فى نفس اليوم الى مكتبة المعادى ولحسن حظى كانت نفس المعاملة باحترام لذا يتبادر الى ذهنى عدة اسئلة :-
اولها هل هو يوم من الايام التى تصبح فيها لتجد كل الناس قد اصبح الاحترام سمة اساسية فى تعاملتهم مثل فيلم ارض النفاق ( احد الاشخاص وضع مسحوق الاحترام فى ماء النيل مثلا )
ام اننى محظوظة لانى تعاملت مع اشخاص مازالوا يؤمنون باحترام غيرهم كما يحبوا ان يحترموا
ام ان الاحترام اقتصر على حى المعادى !!!!!!!!!

ايمان مجدى

2009-03-10T21:33:00.004+02:00

كلمتين من قلبى
انقطعت فترة عن التدوين والحمد لله رجعت ادون تانى (مدونتى القديمة – شخبطة كلام -) كنت بدات فى نشر يوميات كرسى على المدونة والعودة من جديد بيوميات كرسى تانى وحلقة جديدة

يوميات كرسى

ـــــــــــــــ

يا مرحب يا مرحب نورتونا والله
انى مستكة كرسى المطبخ انى جاعد هنا طول الوجت جدام الفرن
اصل حدانا فى البلد لازم الستات تخبز كل يوم الفجرية .
انى عايش مع الخالة حفيظة وابا الحاج اسماعيل والواد سلاكة واخوه بركة واخته هنادى
كل يوم الفجرية تجوم الخالة حفيظة ( احفظها يارب ) تعجن العجين وتخبز الخبيز اشى فطير وشى وشويات فضلت خيركوا ونفسها فى الاكل جميييل يا اخوانا .
اتفضلوا كلوا ( يارب يخليكى يا ابلة حفيظة ) بس ابا الحاج اسماعيل الله ي...... ( بلاش عيب يا واد يا مستكة ده ابا الحاج برضو ما يصحش )
اصل ابا الحاج مفترى ايوة الله زى ما بجولكم كده , كل يوم يجوم يزعج فى الخالة حفيظة ( احفظها يارب ) مع انها شقيانة طول الليل والنهار والبت هنادى بنتها غلسة ولا بتعمل اى حاجة فى البيت اصلها تنكة ومايعة طول الليل والنهار تحط اشى احمر وازرق فى وشها
والواد سلاكة برضو يجول ايه..... انى راجل ما اعملش مااسويش واشى ايه وبتاع ايه اهو واد عبيط .
اخوه بركة بقى الله يخليه هو اللى بيساعد الخالة والله واد مؤدب وعسل يجوم الصبح صباح الخير يا اما تؤمورينى بشىء جبل ما يروح الارض وبعدين يمشى على شغله الهى يحفظه اصله طالع طيب زى الخالة ايوة الله
اييييييييييه دنيا
البت هنادى بجى لما تيجى تخبز تجعد عليا وتحركنى وهى جاعدة عليا شوفوا الافترى ......ربنا يسامحها
مش زى الخالة حفيظة (الهى يحفظها )
الله الله الخالة جاية تخبز يالا يا خالتى تعالى وهنخبز وهنخبز
لااااااااااااا هنادى ليه يا خالة هو انا زعلتك فى حاجة بلاش يا خالة هنادى لا بلاش يا خالة بلاااااااااش
طرااااااااااااخ

مستكة ابو جبل

من جدام الفرن
بيت ابا الحاج اسماعيل
الارياف- مصر

ـــــــــــــ

ايمان مجدى